في هذا الركن ياما بكيت

الشاعرة دعاء النمر‏.

في هذا الركن ياما بكيت

وجيت على همى واتحديت

وشاهدة مرايتى ع الواقعه

خصل مبرومة م التوهان

وكحل سواده غطا الليل

ولون فستان مانيش حباه

لبستو عشان اتوه جواه

وأمحى ل روحى أي دليل

....... .......

سهرت كتير

ابرمج قلبى مايخطيش

ولا يعامل بشر بأمان

يادوب اغفل يروح ب مافيش

يأمن كل كائن خان

وقال إنسان

يادي الخيبة على الركن الي برجعلو

وقطع قلبى م الأحزان

يادى الفستان ويادي الكحل والمريات

وهات ياعياط

واكسر كل مرة حاجات

وارجع تاني اجمعها

حاجات مشروخة من جوة

وقال ...عمالة المعها

انا والله مش عارفه

اكمل بيا تانى ازاي

وانا جوايا فكر سخيف

يارب ياتبعد العالم

ياإما تسيبلي قلب نظيف



[caption id="attachment_15067" align="alignnone" width="167"] الشاعرة دعاء النمر‏.[/caption]



كشاف جماهير