آمال سالم تكتب : لكن خلينا ولاد أصول
جريدة جماهيرلما تلاقي نفسك ما بتنكرش الجِميل والمعروف ،ولسه شايل جوّاك فضل وإحسان معيّن حد عمله معاك في يوم من الأيام اعرف إنك أصيل...
لما تلاقي شعورك تجاه حد ما بيتغيّرش لمجرد خلاف حصل بينكم وما قلبتش الترابيزة عليه لمجرد إنه دخل معاك في عتاب ..اعرف إنك أصيل ...
لما تلاقي نفسك لسه بتقدّر وجود ناس معيّنة في حياتك مهما شفت منهم ومهما عملوا لأنك واثق من جواك إن ده من ورا قلبهم....اعرف إنك أصيل..
- لما تتعوّد على كلمة "آسف "و "حقك عليا " و "أنا ما اقصدش "
وتتعوّد إنك تطيّب الخاطر وما تكسرهوش ...اعرف إنك أصيل
لما تعترف بينك وبين نفسك إنك أخطأت في حق حد معيّن، وبتحاول تبيّن له إنك فعلا متضايق عشان اللي صَدر منّك ....إعرف إنك أصيل
لما ما تنكرش فضل أكتر ناس كانوا جنبك في العُسر قبل اليُسر ....وتفتكرهم دايما بالخير اللي عملوه معاك ... اعرف انك أصيل
كلمة ده حد أصيل مش كلمة سهلة ولا بتتشرح بالكلام ....
الأصل الطيب قوة مش ضعف
لكن خلينا أولاد أصول....