الكاتبة آمال سالم تكتب عن : الإنتصار الحقيقى

الإنتصار الحقيقي أنك تبقي علي إنسان
مافيش أى إنتصار فى إنك تكسب نقاش أو توصَّل للي قدامك إنك كشفته ، لأنك فى الحقيقة بتعريه قدام نفسه وقدامك ، ومفيش إنسان سوي هيسحمل التعرية دي
كلنا بلا إستثناء نتَجمَّل قدام البعض وده مش عيب ، ما دام ربنا ساترك تفضح نفسك ليه.
مع محاولتك طبعا إنك تتغير للأفضل لو بالإمكان
موضوع إنك تزنق حد قوي عشان تكشف حقيقته أدام نفسه وقدامك ملهاش غير ردتين فعل
إما إنه يهرب منك وإما يهبشك عشان يدافع عن نفسه ٠
وفى الحالتين إنت خسران خسران
عشان كده دايما ساعة المواجهة لازم التراجع يتم في اللحظة الصح عشان لو معملتش الحركة دية ، صح خلاص زنقت الدنيا واتقفل الماتش
التَجمُل اللي بنعمله مانحبش حد يشيله بقسوة
التجمل ده هو ورقه التوت اللي بتسترنا حينما نفقد وتتعزر الأسباب لظهورنا في بعض المواقف كما نتمني
عشان كده مش لازم في النِقَاش تثبت إنك صح مش هتفوز بجايزة.
مش لازم فى الخلافات تدبح عشان تنتقم لنفسك وتثبت إنك مُحَق.
خلي دايما قدامك سَكة يرجع منها اللي زعلان منك أو زعلان إنت منه ، فَهِمه إنك فاهم بس مش أوي وسيبله مساحة يُستر بها نفسه.
سيبوا الأبواب مواربة يمكن ترجعوا وسيبوا للي قُدامكم منفذ يقدر يحمي بيه نفسه ويسترها
في النهايه بلاش تضيق الحصار لأنه مش إنتصار .
الإنتصار الحقيقي إنك تبقي علي إنسان.
وعلي ستر إنسان
اللهم أسدل علينا جميعا سترك الجميل في الدنيا والآخرة .